Mat 22 | BEF | STEP | Yesu bame ka mone hiti ma luto lu epi'ehina:

Matthew 22

Ana'i kata nehite sipi nose'na nosemofihi bame ka'a

Lk 14:15-24

1 Yesu bame ka mone hiti ma luto lu epi'ehina: 2 Kokulumamofihi kapo'aya gihiti bo mone'mofihi hapa'a legita huto ni'ibe. Gihiti bomofihi pana'auba liha'a li'ehigo afo'afu sipi nose'na laita hu'ehina yabe. 3 Ya huloto koko pana'a enoho lifigo enali bite bona'i nose'na nalabe lite kehe i'ahana, ya hago ana bona'magi mebilune li'ahana yabe. 4 To ai koko pana'a aku'i mone'a enoho lifito ma luto lu epi'ehina: Nani bona'i kehe i'ohuna bonatoga lenali bite ma lite lu epilo: Hohe, hohe. Lenali kehelilo. Nani nose'na ali loloba hu'ohube. Nani bulumaka yaga'ni bo'a hiti to yagakafa giliba'a hiti hoto linohi bi'ohube. To asaga'naya ali loloba hugo nose molose huto ni'ibe. Lenali ete ana kata nohuna nose'na nalo. 5 Ya luto lu epigo enali koko pana'amagi ana kaga lite bite kehe ina ana bona'magi ana kaga kosele'ani enahago mekehelise bu folola e felela hi'ahana yabe. Moneuba foya'aga nobigo moneuba bisinisi lili'na'alo nobigo hi'ahana yabe. 6 Ya nehago luga'a bona'magi ana gihiti bomofihi koko pana'a enayato lilete naga osatu luga'a nebiyigite to luga enoho fili'ahana yabe. 7 Ya hago gihiti bouba italuga logo bigo gimi bo'a enoho lifigo bite koko pana'a enehe'ahana bona'i noha'a gobe posa gibe hite enoho su he'ahana. Ya hilete hepa'ani logo goyoboto su he'ahana yabe. 8 Ya huloto gihiti bouba koko pana'a kehe iloto ma luto lu epi'ehina: Ana kata huse nose'naya laita huto li loloba hu'ohuta ma ninaya to bona'i kehe uta bona'magi hapa'ani bati mehigo meabe. 9 Ya hu'ehinagi lenali kapo loe lae hu'ehinalo bite nehite bona'i bila ela hilana enali'i kehe i nupa hite enele'mete enogo ana kata nose'na nalabe. 10 Ya luto lu epigo ana koko pana'amagi kapolo kapolo bite mine baga i'ehite bona'i mana'afi to sibina hana'afi kapolo huto hana kehe i nupa nupa hite enele'mete ago enali ana kata nehana nohi li bai tete mine'ahana.

11 Enali boana'i tite mine su helago gihiti bouba bu enagalube'mu nonuga ti'ehina. Ya huloto ai bo mone gukete mana'a li mehekolo'ehina bo nohina bu go'ehina. 12 To gihiti bouba ya'mana bo ma luto lu emi'ehina: Nalaluo, kai hena hibe luto kimi'ohuna gukete mana'a mehepise ma nonuga ti'ahane? Ya luto loka hago ana bouba ai kaga meluse fa'mene mino'ehina yabe. 13 Ya higo gihiti bouba koko pana'a ma luto lu epi'ehina: Lenali ma bo gilo, yato naga ite fegutoga he'mi melenogo ai metepugu minalibe. Ai ana metepugu nohuto yibi nama huloto baga yogo'a henibe yugupobe hilibe. 14 Yesu kaga'a lu pa so su hoto lu'ehina: Hu'mau bona'i babu lito kehe ilata nohibe. Ya huloto ai ana bonaluguti mone'isi mone'isi enele'malina'mu yabe, luto Yesu lu epi'ehina yabe.

Takisi efahi he'misemofihi hapa'amu Yesuhi loka he'ahana

Mk 12:13-17; Lk 20:20-26

15 Enali Felosi bona'magi Yesuhi fi taga huto kaga loka mika halune lite enali lu keheli'ahana. 16 To enali pana'alobo'ani hiti to Helotihi pana'alobo hiti enoho lifigo Yesutoga bite ma lite li'ahana: Tisao, kai ma'nakago lu epilata nohanogo lali akeheli'ohune. To kai ma'nakago luto Hu'mamofihi hapa'amu babu boana'i kaga lu enelepilata nohane. To kai moneko bomofi kumuko luto kekesa yigiba yigiba mehulata nohane. Kai asaga bona'i moneko kagago lu epilata nohata bo nohane. 17 Ya hu'ehinagi kai ma kaga lu limibo. Kai henabe luto kekesa noyigine? Lomu gamani bomofito takisi he'milata nohutaba lali keya kagati li gofa nohopi to bati huto nohe'mune? Ya, kagatilo nona'a lu limibo. 18 Yesu mi'i malalune'mu nehana kaga'ani akeheliloto ma luto lu epi'ehina: Lenali fagalo bona'i. Lenali henabe lite nimi'i nemalabe? 19 Takisi efahi legeya'a mone'a li nelepilo. Ya ligo enali efahi legeya'a mone li emi'ahana. 20 Ya hago ai li enelepiloto enoloka ho'ehina: Ma okaba'a hiti gi'a hiti kiyi'afihina ni'ibe? 21 Sipi Lomu kaba bomofihina'a ni'ibe, li'ahana. Ya nelago Yesu ma luto lu epi'ehina: Ya hinogomo Lomu kaba bomofihi nasana'a emilo, to Hu'mamofihi nana'aya Hu'mamofitogago emilo, luto Yesu lu epi'ehina yabe. 22 Yesu ya luto kaga'anilo nona'a lu epina kaga hapa'a kehelilete keka keka lataha'anitu hilete abifa hi'ahana yabe.

Bo fili'ehinagati aku'i ho tisemofihi hapa'amu Yesuhi loka he'ahana

Mk 12:18-27; Lk 20:27-40

23 Ana yupahisigo Satusi bona'i Yesutoga e'ahana. Enali ya'mana bomagi filise bona'i aku'i ho metilabe lite lilata nehana yabe. Ya nehana bomagi Yesutoga elete ma lite loka he'ahana: 24 Tisao, Moseu ma luto lu'ehibe. Bo moneuba yagapana'i meketose nohuto fililenogo ana bomofihi gonauba go'afihi a'i liloto yagapana'i fili'ehina bomofihi nona'a ketalina'mu yabe. 25 To koyapa'i sebeni koguna mine'ahana, enogo'anifu liha'a liloto yagapana'i meketose fili'ehina yabe. 26 Ya higo gona'auba ana a'i li'ehina ana huto yagapana'i meketose fili'ehina. Ya higo ana megesalo gona'auba ana a'i liloto ana suhi huto yagapana'i meketose fili'ehina. Ya hite asaga'i ana kogunamagi ana a'i lina yagapana'i meketese fili su he'ahana yabe. 27 Ya hilago alihi ana ana'i fili'ehina yabe. 28 Asaga bona'i fili'ahanagati aku'i ho tilana yupahi ana koguna sebeni'a ho tilana ai ana a'iba kiyi'afihi liha'a lolo hilina ni'ibe? Asaga'i sebeni'a kogunamagi ana a'i liha'ani le'mo lolo hi'ahana yabe. Enali ya lite Yesuhi loka he'ahana yabe.

29 Ya lago Yesu ka'anilo nona'a lu epi'ehina: Lenali mono ka hiti to Hu'mamofihi amuya'a hiti keheli bati mehi'ahabe. Lenali lenekesa yigise'natini asaga'i sibina hu'ehibe. 30 Bona'i fili'ahanagati ho tilana yupahi bo hiti a'i hiti li bo alobo mehilana kokulumalugu agelomagi suhi hite minalana'mu yabe. 31 Ya hu'ehina ya'ma filise bona'i aku'i ho tise kagamofihi lenoloka halube. Mono bukugu Hu'mau ma luto lu lepi'ehina kaga mekeheli'ahafihe? Ai ma luto lu'ehibe: 32 Nani Abalahahi afo'afita nohube, to nani Isakahi afo'afita nohube, to nani Yakopuhi afo'afita nohube, luto Hu'ma lu'ehina yabe. Hu'ma ai fili'ahana bona'magi afo'anifu menohunagi enali minoba minoba bona'magihi afo'anifita nohibe, luto Yesu lu epi'ehina yabe. 33 To asaga boana'magi Yesu enelepi'ehinana'mu lite enegelo bi'ahana yabe.

Kohe toto yata'a keya ka

Mk 12:28-34; Lk 10:25-28

34 Yesu lina kagauba Satusi bomagihi enabagalo ifi tago enali kaga meluse mine'ahana. Ya hite Yesuhi kaga'auba enoho fi tago kaga melise nehago Felosi bomagi be gelete enali Yesutoga ete li nupa hi'ahana. 35 Ya hago keya ka tisa bo moneuba Yesuhi loka mika hoto mi'i malalube'mu huloto ma luto loka ho'ehina: 36 Tisao, hiya keya kauba asaga keya ka enebe ligito sipi'a ni'ibe? 37 Ya luto Yesuhi loka hago Yesu ma luto lu epi'ehina:Sipi bo ai Hu'makafu yabe. Kai asaga kugufaka hiti kemehaka hiti kekesa yigise'naka hiti to asaga komopaka Hu'mamofihi aisigo emi su hobo. 38 Ya'ma keya kaya ai kohe toto sipi keya ka ni'ibe. 39 To ana megesalo keya kaya yata'a keya kamofihi suhi huto mone'ago huto nesi'a ni'ibe. Ai ma luto ni'ibe:Kaika kugufaka le'mo bati huto kaba nohata suhi luto kigi bonaka koyone hu epito enele'mo bati hu epolobo. 40 Ya'ma keya ka loemale'i hapa'a lufusa'a lolo hite emalo ke'aha'igo luga'a Moseu lu'ehina keya ka hiti to kaga lu yege hese bomagihi enelepimofa'na huse'na'ani ifo etali etugupisalo neminabe, luto Yesu lu epi'ehina yabe.

Mesia kumu Yesu Felosi bona'i enoloka ho'ehina

Mk 12:35-37; Lk 20:41-44

41 Enali Felosi bona'i li nupa hite analo nehago Yesu ma luto enoloka ho'ehina: 42 Lenali Mesia kumu hena hibe lite nekehelibe? Ai kiyi'afihi pana'a nohibe? 43 Ya luto enoloka hago enali ma lite lu emi'ahana: Tebitihi pana'amo nohibe. Ya lago Yesu lu epi'ehina: Ya lanagi to hena higo Sikalafu'uba Tebitihi le'mo kugu higo ho tito Sipi Bo'nibe lu'ehinabe? Yalo Tebitiu ma lu'ehina:

44

Sipi Bo Hu'mau ma luto nani Sipi Bo'nimofihi
lu emi'ehina:
Kai nayahi lamaga'nilo minolotoka
to nani fatehaka enoho su holenogo,
melugu minelenogo,
kai kigigusatu ifi to epalalane.

45 Tebitiu ai'a Sipi Bo'ni yabe luto gi molo'ehinamo to aku'i hena hibe luto Mesiau Tebitihi tata'afu lolo hilibe? Ya luto Yesu enoloka ho'ehina. 46 Ya luto enoloka hago bo moneuba ho tito Yesuhi loka mehalina'a hu'ehina yabe. Ya'mana yupahi Yesuhi kaga'alo koli hilete alihi yupaha'a loka mehe'ahana yabe.